|
 22-7-2010.- O 8 de agosto, co gallo da celebración do Domingo Deportivo, o Concello de Mesía ofrece a posibilidade de practicar distintas actividades deportivas e de asistir ao torneo de fútbol onde as parroquias do municipio se disputarán o primeiro posto e o conseguinte premio.
O evento comezará ás 11:00 horas no Complexo Deportivo da Mata, situado ao lado da piscina municipal en Xanceda. Durante toda a mañá iranse sucedendo diversas sesións para a práctica de distintos deportes: atletismo, fútbol 7, cachibol, bádminton, ping-pong, hóckei, iudo, béisbol, etc. Esta sesión matinal de deporte rematará cun baile de aeróbic. E despois, ás 14:00 horas, está previsto o xantar no merendeiro do complexo deportivo, coa comida que cadaquén leve da súa casa.
Para participar no Domingo Deportivo cómpre inscribirse previamente no teléfono 981 68 72 41 durante este mes de xullo. Aínda que é unha actividade completamente gratuíta, o concello precisa ter unha estimación do número de participantes para a organización.
Pola tarde, o Domingo Deportivo mudará de escenario para trasladarse ao novo campo de fútbol municipal de herba artificial en Visantoña. Alí, a partir das 16:00 horas, vaise disputar unha nova edición do Torneo Interparroquial de Fútbol.
Os equipos que desexen competir deben anotarse chamando ao 981 68 72 41. No momento da inscrición hai que facilitar os nomes de todos os xogadores. O prazo para facelo remata o 30 de xullo, día no que se procederá ao sorteo do cadro de competición, ás 19:30 horas na Casa da Cultura.
 Cómpre salientar que o número máximo de xogadores por cada equipo é de 15 e só se permiten 3 persoas non empadroadas no concello por equipo. Do mesmo xeito, se unha parroquia non reúne suficientes xogadores, poderá constituír un equipo en conxunto con outra parroquia.
O Torneo Interparroquial de Fútbol contará con dúas categorías de idade: unha de 8 a 15 anos (hai que presentar o DNI á hora de anotarse para comprobar as idades) e outra de adultos de 16 anos en diante. Por suposto, os equipos poden ser mixtos, con xogadores e xogadoras.
Na categoría de adultos, o premio será unha cea para os compoñentes do equipo gañador, nun restaurante do concello a escoller polos gañadores e cun importe total máximo de 350 euros. Para a categoría infantil, os primeiros clasificados poderán participar nunha saída ao cine, que inclúe tanto as entradas como o transporte en autobús.
O Domingo Deportivo está integramente organizado por persoal e con medios do Concello de Mesía, e conta coa colaboración de Coca-Cola.
|
