|
13-05-2010.- A escola da parroquia de Mesía acolle este domingo 16 de maio a inauguración da exposición fotográfica "Parroquia de San Cristobo de Mesía/Doce casas con historia", dedicada á arquitectura tradicional das residencias familiares da zona. A apertura da mostra, prevista para as seis da tarde, incluirá unha actuación musical e unha mesa redonda. En concreto, a inauguración e a presentación contará coa presencia do alcalde, Mariano Iglesias Castro, e da presidenta da Asociación de Amigos da Capela de Nosa Señora de Arxán, Nieves Lameiro. Para arredor das seis e cuarto está programada a actuación do grupo ordense de gaiteiros "Os Viqueiras". De seguido, ás sete da tarde, comezará unha mesa redonda baixo o nome de "Arquitectura e memoria familiar". Nela intervirán Jesús Verea García, funcionario de banca de Mesía; Leandro del Río Regos, arquitecto de Ordes; Manolo Pazos Gómez, historiador de Oroso; e Gumersindo Campaña Ferro, cura-administrador parroquial de San Cristobo de Mesía. A mesa redonda estará moderada por María Dolores Sánchez Recouso, licenciada en Ciencias Políticas natural da parroquia. A mostra poderá ser visitada tamén o luns 17 de maio, Día das Letras Galegas, en horario de dez da mañá a dúas da tarde. Esta actividade, de entrada libre, está organizada pola Asociación de Amigos da Capela da Nosa Señora de Arxán, e conta coa colaboración do Concello de Mesía e da Deputación da Coruña.
|
