DESDE HOXE PODEN SOLICITARSE AS AXUDAS DO INEGA PARA RENOVAR EQUIPOS DE ILUMINACIÓN INTERIOR
28-12-2011.- O Concello de Mesía informa sobre a convocatoria de axudas do Plan Renove de Equipos de Iluminación Interior, que se poden solicitar a partir de hoxe e durante trinta días hábiles, nos establecementos adheridos a esta iniciativa do INEGA. A convocatoria foi publicada no Diario Oficial de Galicia deste martes 27 de decembro e ten por obxectivo instalar iluminación enerxeticamente eficiente en preto de 250 edificios e vivendas de toda Galicia. Para eso, conta cun orzamento duns 490.000 euros.
Que se subvenciona?
O Plan subvenciona tanto a substitución de lámpadas e luminarias convencionais por outras máis eficientes como o troque de balastos -parte interior do equipo de iluminación- de convencionais a electrónicos. Tamén se fomenta a instalación de sistemas de regulación a través de fotocélula e de detectores de presenza.
Contía das axudas
A contía da subvención variará en función do tipo de equipo que se substitúa (os detalles figuran na convocatoria). Non obstante, a axuda cubrirá ata un 25% do custo da nova instalación, esixíndose un investimento mínimo de 500 euros. Os límites máximos serán de 1.500 euros no caso de pisos, 10.000 euros en bloques de vivendas, e 25.000 euros en edificios do sector terciario.
Requisitos
Un dos principais requisitos é que as actuacións subvencionadas teñen que levar asociada unha diminución anual de polo menos o 30% do consumo de enerxía convencional, garantindo unha comodidade lumínica adecuada á tarefa a realizar.
Tramitacións
Os beneficiarios do Plan -particulares, comunidades de veciños ou empresas do sector terciario- poderán solicitar a axuda nos vindeiros trinta días hábiles. Débese tramitar a través dos establecementos adheridos ao plan, que son quen realizan a solicitude e fondos mediante a aplicación web recollida na páxina do INEGA.
Pola súa parte, as entidades colaboradoras dispoñen de dez días para renovar a súa adhesión ao plan se participaron na anterior convocatoria, ou para solicitar unha nova alta.
