|
 11-8-2010.- O Concello de Mesía acaba de estrear a ruta de sendeirismo homologada entre A Fraga de Visantoña e a área recreativa da Ponte Carballa en Olas. É unha das primeiras rutas con este recoñecemento que existen en toda a comarca. Nos seus arredor de 13,5 quilómetros de percorrido, atravesa diversas paraxes nas que se poden observar as paisaxes agrarias e forestais propias da zona, pero sobre todo destacan catro exemplos de patrimonio histórico e arquitectónico: os muíños da Ribeira, de Queiroa, do Batán e da Cubela.
A ruta, promovida polo Concello cunha axuda específica da Unión Europea xestionada a través da Axencia Galega de Desenvolvemento Rural (Agader), conta en todo o seu itinerario con diversos paneis explicativos, marcaxes de orientación, sinais e balizas de ubicación. Esto permite efectuar o percorrido sen risco de perderse e contando sempre con suficientes elementos interpretativos para coñecer mellor o lugar.
De acordo coas cualificacións obtidas para a súa homologación, o seu nivel de dificultade da ruta é baixo, a continuidade está ben sinalizada, o percorrido é cómodo ao poder realizarse sobre superficie lisa, e o esforzo físico que se require aproxímase ás tres horas de marcha efectiva.
Un grupo de veciños xa puido coñecer de primeira man hai uns días a nova ruta. Foi nunha actividade organizada polo Concello e que supuxo o percorrido inaugural para este novo recurso de lecer e de atracción turística.
Se desexa coñecer en profundidade as características da ruta homologada, ver e descargar un dos paneis ilustrativos e un mapa, pode acudir á nova sección dedicada á ruta desta mesma páxina web, facendo clic aquí ou buscando o enlace correspondente no menú lateral esquerdo.
|
