24-11-2011.- O Concello de Mesía súmase á conmemoración do 25 de novembro como o Día Internacional para a eliminación da violencia de xénero e manifesta o seu apoio a todas aquelas persoas que sofren este mal endémico dos nosos días. Ademais anima a todas aquelas persoas que sofren maltrato a que o denuncien no teléfono 016, no teléfono de información ás mulleres: 900 400 273 ou incluso poden acudir ao Centro da Información á Muller (CIM) de Ordes, un servizo da Mancomunidade de Ordes da que o Concello de Mesía forma parte.
21-11-2011.- Tras varios aprazamentos da final por mor de lesións e do mal tempo, o I Torneo de Pádel Concello de Mesía xa ten gañadores. Son Víctor Carreira e Marcelino Pena, parella de Arzúa que se impuxo na final a Miguel Rodríguez e a Manuel Bermúdez, de Mesía. A concelleira Pilar Sánchez Ulloa acudiu a entregar os trofeos e destacou o bo nivel de participación e de xogo desta competición, que contou coa colaboración de Coca-Cola. A galería de imaxes da entrega está dispoñible aquí.
15-11-2011.- O Concello de Mesía informa de que hoxe entra en vigor a Lei de Mobilidade de Terras da Xunta de Galicia, que pretende poñer a disposición dos gandeiros terras coas que redimensionar as súas explotacións. Entre os cambios con respecto á Lei do Banco de Terras de Galicia de 2007, a Xunta menciona a eliminación do dereito de tanteo e retracto, a ampliación da base de actuación territorial e das funcións do Banco de Terras, a posibilidade de intervir sobre bens de propietarios descoñecidos, e medidas para incorporación voluntaria de bens ao Banco de Terras por parte de propietarios.
15-11-2011.- Desde hoxe, e por un periodo de trinta días hábiles, está exposta ao público a aprobación provisional de imposición e da ordenanza fiscal reguladora da taxa pola expedición de documentos administrativos, nos termos en que se acordou polo Pleno do Concello de Mesía, na sesión celebrada o 7 de novembro de 2011. Premendo aquí pódese acceder ao correspondente anuncio de información pública no Boletín Oficial da Provincia.
14-11-2011.- A unidade móbil de inspección técnica acudirá a Mesía o martes 29 de novembro, para ofrecer o servizo de inspeccións técnicas periódicas de ciclomotores de dúas rodas e máis de tres anos, motos e quads de máis de catro anos. A unidade móbil estará situada a carón do antigo colexio de Lanzá, detrás da fábrica de Cerámica Verea, pola mañá e pola tarde. A hora de atención asignarase directamente na unidade móbil esa mesma xornada.
10-11-2011.- Desde hoxe, e por un periodo de trinta días hábiles, está exposta ao público a aprobación provisional da modificación da ordenanza fiscal reguladora do imposto sobre bens inmobles, nos termos en que se acordou polo Pleno do Concello de Mesía, na sesión celebrada o 7 de novembro de 2011. Premendo aquí pódese acceder ao correspondente anuncio de información pública no BOP.
09-11-2011.- Este venres 11 de novembro, a partir das 21:30 horas na Casa da Cultura en Xanceda, terá lugar unha reunión explicativa do novo servizo de internet e telefonía fixa mediante banda larga que se proxecta instalar no municipio de Mesía. O Concello colabora coa empresa Intermax neste proxecto. Técnicos e persoal especializado da compañía serán os encargados de dar a coñecer os servizos que poderían ofrecer. Á reunión están convocados todos os cidadáns de Mesía. Estes días remitiuse por correo a todos os domicilios unha carta da empresa.
08-11-2011.- Os cidadáns de Mesía xa poden utilizar o mini punto limpo que o Concello acaba de instalar nun lateral da praza pública de Xanceda. Nel pódense depositar lámpadas de baixo consumo, pilas, cartuchos de impresora, móbiles e outros pequenos aparellos electrónicos, e casetes e discos cedé ou deuvedé. Son materiais que se poden separar previamente na casa e aproveitar calquera visita a Xanceda para desfacerse deles de maneira apropiada. Despois son correctamente reciclados e postos en valor por parte dunha empresa especializada, evitando graves prexuízos para o medio natural e, por extensión, para a saúde humana. O mini punto limpo forma parte do programa ambiental municipal 'RecicloMesía,' que nos últimos meses xa implantou un programa de compostaxe doméstica e outro para potenciar a recollida selectiva no contedor amarelo, destinado aos envases. Máis información en 'ler máis'.
07-11-2011.- Arredor de setenta persoas participaron nas saídas ao Balneario de Guitiriz organizadas polo Concello de Mesía no seu programa "Deporte é saúde 2011". Distribuidos en dous grupos, para optimizar o aproveitamento das saídas, efectuaron catro saídas cada un deles, completando un circuíto termal útil para mellorar a súa condición física. O transporte organizouse en autobús e a subvención municipal deixou o prezo en 40 euros por persoa, o total para as catro xornadas.
