ENTRA EN VIGOR A LEI DE MOBILIDADE DE TERRAS DE GALICIA
15-11-2011.- O Concello de Mesía informa de que hoxe entra en vigor a Lei de Mobilidade de Terras da Xunta de Galicia, que pretende poñer a disposición dos gandeiros terras coas que redimensionar as súas explotacións. Entre os cambios con respecto á Lei do Banco de Terras de Galicia de 2007, figuran a eliminación do dereito de tanteo e retracto, a ampliación da base de actuación territorial e das funcións do Banco de Terras, a posibilidade de intervir sobre bens de propietarios descoñecidos, e medidas para incorporación voluntaria de bens ao Banco de Terras por parte de propietarios.
Afecta a toda a superficie con vocación agraria
Segundo a Consellería de Medio Rural, a nova normativa afecta a toda a superficie de Galicia, en terras con vocación agraria. Deste xeito o Banco de Terras poderá actuar en superficies forestais e incluso en zonas cualificadas como urbanas que na actualidade estean sendo empregadas con uso agrario. Todo esto implica a eliminación das Zonas de Especial Interese Agrario, categoría que tiña a comarca de Ordes. En cambio, establécese a posibilidade de decretar Zonas de Actuación Agraria Prioritaria para adoptar nelas medidas dinamizadoras baseándose nos seus valores agrarios ou ambientais especiais.
Propietarios descoñecidos
A Lei de Mobilidade de Terras pretende tamén mobilizar e aproveitar as parcelas rústicas de propietarios descoñecidos. Estímase que en toda Galicia suman unha superficie de 5.600 hectáreas. O Banco de Terras, sen poñer en discusión a titularidade dos predios, poderá xestionar toda esa superficie para aproveitamento productivo, mellorando as condicións de cultivo.
Eliminación do dereito de tanteo e retracto
Outra das modificacións principais da nova norma é a eliminación do dereito de tanteo ou retracto que a anterior lei lle reservaba ao Banco de Terras de Galicia ante calquera operación de compra-venda de parcelas que se rexistrase en Galicia.
Incorporación de bens
Co fin de que os propietarios interesados incorporen os seus bens ao Banco de Terras, tamén se establecen medidas como garantirlles a percepción dos prezos de referencia por arrendar eses bens, con independencia de que o importe acordado entre as dúas partes ou o ofertado polo potencial arrendatario sexa superior. Esta medida fai que o prezo pase a ser un factor de concorrencia no caso de que máis dun arrendatario opte a unha mesma terra.
A lei permítelle ademais ao Banco de Terras ofrecer servizos de intermediación entre terceiros para o arrendo ou aluguer de instalacións vencelladas ás explotacións agrarias. E tamén abre a porta de que as parcelas incorporadas e arrendadas poidan ter máis uso que o agrario. A Consellería fala de predios con clara vocación de seren empregados para conservar a natureza ou o patrimonio histórico, e tamén a ordenación de fincas forestais.
Cesións e doazóns ás administracións locais
Por último, os Concellos poderán solicitar fincas para usos sociais de tipo deportivo, asistencial ou lúdico. A Xunta estima que en toda Galicia existen unhas mil fincas susceptibles de ser solicitadas polas administracións locais. O Banco de Terras poderá facer unha adxudicación directa deses bens e dereitos, de xeito gratuíto e en forma de cesión ou doazón, tras a aprobación por parte do Consello da Xunta e sempre que a incorporación ao patrimonio dos concellos estea motivada pola conveniencia ambiental ou por outros motivos de interese social determinado.
15-11-2011.- O Concello de Mesía informa de que hoxe entra en vigor a 
