|
 23-8-2010.- A Festa da Auga convertiuse nos últimos anos nunha das citas máis destacadas da programación de actividades estivais do Concello de Mesía. Esta vez non foi menos, e na xornada deste sábado 21 de agosto máis de 300 persoas achegáronse ata as instalacións da piscina municipal en Xanceda para divertirse coas distintas atraccións para todas as idades, nun día que axudou cunhas excelentes temperaturas.
Os nenos e nenas foron os principais protagonistas da festa. Na piscina infantil dispuxéronse varias lanchas inchables para que xogasen. A carón dela, xa sobre superficie firme, instalouse tamén un castelo inchable no que non houbo nin un chisco de acougo en todo o día. Na piscina de adultos colocáronse tamén dous elementos inchables, un deles con forma de tobogán, moi utilizado, e outro con obstáculos con motivos selváticos.
Mais a Festa da Auga contou con máis propostas, á marxe das atraccións inchables. Por exemplo, os xogos con globos de auga e multitude de probas infantís, nas que participaron ata 100 nenos e nenas de entre 4 a 15 anos.
E o colofón da festa, xa contra o serán, foi o lanzamento de escuma no campo de fútbol contiguo á piscina. Durante unha hora, esta actividade motivou os xogos de nenos, mocidade e adultos.
Á parte de actividades puntuais como a Festa da Auga, a piscina municipal recibe cada día deceas de persoas de todas as idades e procedentes de Mesía e doutros concellos de toda a volta. Gran parte achégase a darse un baño e a tomar o sol, e mesmo hai familias e grupos que pasan o día nas instalacións facendo uso do merendeiro contiguo. Ademais, moitas outras persoas acoden para participar nos distintos cursos deportivos organizados durante o verán: natación, ximnasia acuática, tenis...
Lembre que pode ver as fotografías da Festa da Auga facendo clic na pestana "Galería de fotos das actividades muninipais", situada no menú lateral esquerdo desta mesma páxina web.
|
