|
 14-5-2010.- O Concello de Mesía organiza para o sábado 19 de xuño unha peregrinación a Santiago de Compostela. Trátase dunha peregrinación do máis cómodo, xa que os participantes non precisarán camiñar demasiados metros. Eso si, non dá dereito á "compostela" porque o traxecto vaise cubrir en autobús.
A previsión é que desde as oito da mañán o autocar recolla aos inscritos nas paradas habituais das distintas parroquias. Ás dez a expedición estará na Catedral de Santiago, para poder asistir á Misa do Peregrino, durante a que terá lugar unha ofrenda polos veciños do municipio e tamén haberá ocasión de presenciar o funcionamento de botafumeiro. Tralos actos relixiosos, os participantes nesta actividade terán o resto da mañán libre para pasear polo casco histórico da capital de Galicia. Despois, seguindo co programa previsto, o autobús partirá cara Mesía, facendo antes unha parada en Castrofeito, no concello do Pino. Alí, sobre as dúas da tarde, os 'peregrinos' xantarán no restaurante "A Magdalena". Ás catro da tarde re-emprenderán o regreso a Mesía. As persoas interesadas en participar deben anotarse no departamento de Servizos Sociais ata o 11 de xuño. Os cidadáns censados en Mesía deben pagar 16 euros no momento da inscrición. Os veciños censados noutros municipios terán que pagar 19 euros. Cabe destacar que os gastos do transporte corren a cargo do Concello e que os participantes recibirán no momento de anotarse a información sobre o lugar e o horario das paradas do autobús. Poden obter máis información chamando ao 981 687 238. E se o desexan tamén poden acceder ao bando municipal sobre esta excursión facendo clic aquí.
|
