|
14-12-2011.- O Concello de Mesía pon en marcha un servizo de roupeiro social, pensado para colaborar cos cidadáns con maiores dificultades económicas a través da solidariedade de todos. O servizo recollerá roupa, calzado e calquera obxecto que as persoas que o entreguen consideren que podería ser útil para familias con dificultades. A única condición é que estea en bo estado.
Será o Concello, a través do seu Departamento de Servizos Sociais, o que lle entregue os obxectos á persoa ou familia que os necesite. En todo momento estará garantido o pleno anonimato dos beneficiarios, como é lóxico neste tipo de procesos.
Neste sentido, o servizo de roupeiro social tamén incorpora a posibilidade de realizar anuncios anónimos de solicitude. O taboleiro estará emprazado nas dependencias de Servizos Sociais e calquera persoa poderá pedir a través dun anuncio un obxecto ou peza de roupa en concreto. O Departamento de Servizos Sociais será o que se encargue de poñerse en contacto coa persoa anunciante en canto alguén doe o obxecto solicitado.
A entrega e recollida da roupa, o calzado ou outros obxectos terá lugar sempre no Departamento de Servizos Sociais.
O Concello anima a todas as persoas en condicións de colaborar a darlle un repaso a todas esas prendas que non usan e que están ocupando espazo innecesariamente no armario para darlles unha segunda vida e á vez contribuír a conseguir unha sociedade máis igualitaria a través do altruísmo.
Todos os interesados en obter máis información do servizo de roupeiro social poden chamar a Servizos Sociais do Concello de Mesía, no 981 68 72 38.
|
