|
 4-6-2010.- O programa do concello de Mesía "Tempo fóra para Maiores" púxolle remate ao curso 2009-2010 cunha representación teatral organizada polo departamento municipal de Cultura. A actuación tivo lugar no novo auditorio e sala polivalente habilitado polo concello no edificio do colexio de Lanzá e contou coa asistencia dunhas noventa persoas.
A obra "O gordo e o calvo van ao médico", escenificada pola compañía "Os sete magníficos máis un", entretivo e animou durante hora e media ao público, co que os actores interactuaron para facelo partícipe á xente da historia.
Con esta representación, o concello dá por rematado o curso do programa municipal "Tempo fóra", que ofrece varias sesións semanais en diferentes parroquias durante todo o ano para o colectivo da terceira idade. O programa, que se retomará a partir de outubro, pretende darlles unha alternativa lúdica aos maiores e favorecer a súa socialización. Componse de exercicios para reforzar a memoria, a atención e a concentración, manualidades e xogos.
Ademais deste programa específico, durante o ano o concello de Mesía programa outras propostas para a terceira idade dentro da súa programación xeral. Bos exemplos son a ximnasia de mantemento adaptada a estas idades, as xornadas deportivas do cachibol ou os cursos de manualidades, aos que acoden numerosos veciños deste grupo de idade. Na programación estival, que será presentada nos vindeiros días, tamén se ofertarán actividades para os maiores.
|
