 |
OS CONCELLOS DE MESÍA E DE FRADES CLAUSURAN O SEU PRIMEIRO OBRADOIRO DE EMPREGO CONXUNTO |
|
 |
 |
|
|
|
|
21-12-2011.- O obradoiro de emprego Mesía-Frades I, o primeiro desenvolto en conxunto polos dous concellos, chegou hoxe á súa fin despois de doce meses nos que ofreceu formación laboral e traballo a vinte e cinco persoas que estaban en situación de desemprego, trece de Mesía e doce de Frades.
O acto de clausura contou coa asistencia da delegada territorial da Xunta na Coruña, Belén do Campo, o director xeral de Promoción de Emprego, Andrés Hermida, o alcalde de Frades, Miguel Prado, o alcalde de Mesía, Mariano Iglesias, e a coordinadora do obradoiro e concelleira de Mesía, Pilar Sánchez, entre outros.
O investimento co que contou esta acción, impulsada polo Concello de Mesía co de Frades como entidade colaboradora, foi de 570.000 euros. A gran maioría foi achegada pola Xunta de Galicia, con fondos europeos: 540.000 euros. Os outros 30.000 euros foron sufragados polas dúas administracións locais, a partes iguais.
Os alumnos-traballadores formáronse en dúas especialidades: trece deles en traballos forestais e os outros doce en axuda a domicilio. Na especialidade de traballo forestal os participantes desenvolveron labores de posta en valor de varios espazos naturais e melloras en áreas recreativas e outras dotacións públicas ao aire libre. As persoas da especialidade de auxiliar de axuda a domicilio formáronse e aplicáronse na atención á terceira idade.
As sesións prácticas desenvolvéronse por igual nos dous termos municipais. As clases teóricas tiveron lugar no colexio de Lanzá, que xa fora a sede formativa do obradoiro de emprego que o Concello de Mesía desenvolvera en 2007. As súas instalacións foron escollidas para esta parte do obradoiro por seren as máis axeitadas por ubicación, amplitude, equipamento e comodidade. O equipo encargado da docencia estivo conformado por seis persoas.
Declaracións
No acto de clausura, o director xeral de Promoción do Emprego, Andrés Hermida, explicou que, ademais do investimento no obradoiro de emprego, a Consellería de Traballo e Benestar destinou máis de 111.000 euros en materia de emprego a Mesía neste ano. Permitiron a contratación temporal de nove persoas dentro de plans de cooperación e tamén manter a contratación de axente de emprego e desenvolvemento local.
A delegada territorial, Belén do Campo, felicitou aos alumnos-traballadores do obradoiro e afirmou que con esta iniciativa poderán mellorar as súas posibilidades de inserción laboral, tanto pola formación teórica recibida como pola capacitación práctica conseguida ao longo deste ano.
O alcalde de Mesía, Mariano Iglesias, e o de Frades, Miguel Prado, reivindicaron ante os responsables autonómicos un novo obradoiro de emprego que lle dea continuidade ao rematado hoxe. Mariano Iglesias motivou a petición en que os cidadáns de municipios con dificultades socioeconómicas especiais como os de Mesía e Frades deben ter as mesmas oportunidades laborais que os doutros puntos máis favorecidos de Galicia. Os dous alcaldes tamén agradeceron o comportamento dos participantes e desexáronlles sorte no mercado laboral.
Previamente ao acto, descubríronse sendas placas conmemorativas na área recreativa da Ponte Carballa, unha delas na parte da parroquia de Olas (Mesía) e a outra na parroquia de Abellá (Frades).
A galería de imaxes do acto de clausura do obradoiro e da entrega de diplomas pode verse premendo aquí.
|
|
|
|
|
|
|
|
|
|
|
|
|
