|
28-5-2010.- Cerceda acolle o vindeiro sábado 5 de xuño unha xornada de exaltación da Faba de Lourenzá (Lugo), na que poden participar veciños de toda a comerca ordense, entre eles os de Mesía. As persoas interesadas en asistir a este evento de promoción gastronómica poden inscribirse xa no concello, chamando ao teléfono 981 68 70 01. A xornada comezará ás 12:30 horas, a carón do parque acuático de Cerceda, cun encontro entre alcaldes da comarca e representantes do concello de Lourenzá. De seguido, segundo o programa previsto, un representante da Mancomunidade de Ordes presentará o acto e o alcalde de Cerceda, José García Liñares, daralles a benvida aos asistentes. Para as 13:00 horas está prevista unha degustación de faba de Lourenzá para todos os participantes, previo pago de seis euros por persoa. Ofrecerase faba con carne ou cun produto de mar, ademais de pan. O prezo non inclúe a bebida. Esta comida estará acompañada pola música da charanga Mekanika. Tralo ágape, os asistentes terán ocasión de acudir ao Aquapark durante a tarde para divertirse nas súas instalacións. Todos os interesados en participar poden inscribirse no concello, que se porá en contacto coa organización do evento para que, de ser o caso, flete un autobús gratuíto. Partiría da praza do concello, en Xanceda, ás 12:00 horas.
|
