|
 16-07-2010.- Un verán máis os/as rapaces/as do Concello de Mesía e incluso doutros concellos limítrofes puideron pasar 15 días entretidos e divertidos no campamento urbano que se organizou para cativos con idades comprendidas entre os 4 e os 16 anos. Houbo dous grupos, un de 4 a 8 anos e outro de 9 a 16. En total foron 40 os inscritos. O horario do campamento foi de 10:00 a 14:00 horas e os lugares dependeron un pouco da climatoloxía, de xeito que estiveron na piscina e campo de fútbol os días de sol e no pavillón de Xanceda e na casa da cultura os días de chuvia ou nubrados.
Nesta quincena fixéronse distintos xogos (de presentación, socialización, deportivos, xogos populares) e relacionados con distintos temas como puido ser o circo romano. Tamén houbo distintos obradoiros de manualidades onde se fixeron pulseiras, marcapáxinas, marcos de foto, bonecos, etc. Outro día estivo adicado a actividades de multiaventura e xogos inchables. Os días en que o tempo acompañou os/as cativos/as puideron á última hora meterse na piscina e refrescarse un pouco. Cabe mencionar tamén as distintas saídas que se fixeron, unha ás Brañas da Valga en Visantoña onde os/as nenos/as puideron estudar a flora e fauna do contorno. Outra o venres 9 de xullo ao Aquapark e por último o día 16 ao cine. Estas últimas dúas saídas foron para todas as persoas interesadas, chegando así a ter 100 participantes na saída ao Aquapark e 70 para o cine. O Concello de Mesía pretende con este programa que os pais e nais poidan conciliar mellor a súa vida laboral e familiar neste período de vacacións para os seus fillos. Á vez, o obxectivo é que os rapaces pasen unhas horas entretidas e divertidas da mellor maneira posible. A boa acollida destas propostas fai que ano tras ano medre a demanda e que os participantes repitan a experiencia.
|
