 |
VECIÑOS DE MESÍA PERCORREN A COMARCA DAS MARIÑAS NUNHA SAÍDA DE SENDEIRISMO ORGANIZADA POLO CONCELLO |
|
 |
 |
|
|
|
|
 28-11-2011.- Arredor de quince persoas participaron na saída de sendeirismo pola comarca das Mariñas organizada polo Concello de Mesía este sábado 26 de novembro. O percorrido tivo a orixinalidade de incluír un desprazamento en tren, desde a estación de Curtis ata o punto de inicio da andaina, na estación de Cambre.
Unha vez que un dos primeiros trens da mañá os deixou en Cambre, os sendeiristas percorreron a pé os máis de quince quilómetros de distancia ata o centro da Coruña. A andaina transcorreu pola beira do río Mero, no paseo fluvial entre Cambre e A Barcala ata a localidade do Burgo, xa no concello de Culleredo. Continuaron polo paseo marítimo na Ría do Burgo.
A parada para comer e repoñer forzas tivo lugar nas Xubias. A primeira hora da tarde entraron na Coruña pola zona do porto. As visitas, sempre a pé, sucedéronse polos Xardíns de Méndez Núñez, A Mariña, a Praza de María Pita e a Rúa Real.
Dentro do tempo libre co que contaron os camiñantes durante a tarde, unha parte do grupo decidiu retornar á estación de tren da Coruña dando un rodeo ata a Torre de Hércules e, tras visitaren o monumento Patrimonio da Humanidade, voltaron polo paseo marítimo na zona de Riazor.
A volta a Curtis foi tamén en tren, cun vagón case en exclusiva para os participantes nesta actividade. No traxecto de volta comentaron a experiencia e xa comenzaron a pensar en organizar unha actividade similar.
O tempo acompañou con sol e temperaturas suaves durante toda a xornada. Non obstante, o Concello xa planifica outra nova saída nos meses de primavera, da que informará puntualmente nos boletíns de actividades e a través desta mesma páxina web.
A galería de imaxes desta saída está dispoñible premendo aquí.
Fomento do sendeirismo cunha ruta propia homologada
Esta saída enmárcase nas iniciativas do Concello de Mesía para promover o exercicio físico e os hábitos e vida saudables, entre os que a práctica do sendeirismo constitúe unha das mellores alternativas para todos os grupos de idade, xa que permite adaptarse aos ritmos de cadaquén e non require habilidades especiais.
Ademais das saídas periódicas por toda Galicia, o Concello fomenta a práctica desta actividade coa creación dunha ruta de sendeirismo no propio termo municipal. Trátase da ruta "Da Fraga aos Muíños", homologada pola Federación Galega de Montañismo co código PR-G 117 e incluída por TurGalicia no seu catálogo de recursos turísticos para camiñantes.
A ruta, que percorre as parroquias de Visantoña e de Olas cunha lonxitude duns 14 quilómetros, conforma unha boa mostra do patrimonio natural e paisaxístico do municipio. E ademais puxo en valor o patrimonio histórico e etnográfico, coa restauración de catro muíños en todo o traxecto.
Ademais, nela aplícanse as novas tecnoloxías, xa que desde hai uns meses está dispoñible para ser descargada de forma gratuíta aos chamados teléfonos móbiles intelixentes. |
|
|
|
|
|
|
|
|
|
|
|
|
